Itsinda rya Moriox Kids nyuma yo kuva gutaramira muri Kyrgyzstan muri Nzeri uyu mwaka, rigiye gutangiza irushanwa rya ’Moriox Talent Detection’ rifite intego kugaragaza impano nshya ariko zidafite uburyo bwo kwigaragaza.

Ibi Shema, umuyobozi wa Moriox Kids yabigarutseho mu kiganiro yagiranye na ISIMBI aho yavuze ko bagiye gutangiza iri rushanwa ngaruka mwaka rizagera mu gihugu hose ndetse no mu bihugu byo hanze y’u Rwanda.

Ati "Tugiye gukora ikintu cyitwa Moriox Talent Detection (gushaka impano) izaba imeze nka ’American Got Talent’ ariko tuzajya tubikora ku bushobozi bwacu. Izakora mu gihugu hose uretse no mu gihugu tuzajya dushinga n’amashami mu bihugu bigiye bitandukanye no muri ibyo bihugu byo muri Asia tuzagerayo."

Yakomeje avuga ko intego ari ukugaragaza izi mpano kuko babonye ko hari impano nyinshi ariko zidafite ubushobozi.

Ati "Intego ya mbere twabonye ko hari abana bafite impano ariko dafite uburyo ariko natwe tudafite uburyo bwo guhita dufata aka kanya ariko twabaha urubuga (platform). Hazaba harimo kubyina kuririmba no kuba ufite impano yihariye yakwereka abantu, icyo tuzamufasha tuzamwerekana kuko hazaba hari abacamanza, bizaba ari irushanwa."

"Abana bazatsinda tuzabinjiza muri Moriox tunabahe ibihembo bishimishije, abatazatsinda tuzaba twabamuritse abantu bafite umutima wo gufasha impano, bazaba bababonye bazabafasha. Twe tuzafasha abo dufitiye ubushobozi. Ni igikorwa ngaruka mwaka."

Kwiyandikisha bizatangira tariki ya 22 Ukwakira aho bizamara ibyumweru bitatu bakazajya bandika ku wa Kane no ku wa Gatanu aho kwiyandikisha ari ibihumbi 15 Frw, aya arimo itike yo kwinjira ahantu hose iri rushanwa rizajya ribera.

Moriox Kids igiye gutangiza Talent Detection